【18區搵食-大角咀2.0之超水準慢煮牛丼】日式小店慢煮牛丼｜海量牛肉鋪滿丼飯｜慢煮黑毛豬｜柚子紫薯青蘋果沙律｜冷刀削麵食過未？｜口感煙韌有咬口｜味覺衝擊芫荽奶凍｜芫荽乜乜乜

近幾集18區搵食都係2.0乜乜乜，今集再次嚟到大角咀！特登避開台灣餐廳，除咗台灣嘢，大角咀仲有好多正嘢食！

第一間小島料理，招牌慢煮牛丼，因為店面較細，座位少，晏少少去到都要排隊等位！今次醒目，早兩日打電話訂定牛丼，準時12點到鋪頭，終於食到呢個名物丼飯～慢煮牛丼有西冷/肉眼可揀，肉眼軟腍又多汁～丼飯分3個size，當然要叫大盛！唔係指米飯size，而係指肉嘅份量，大盛有12-13塊牛肉，最啱食肉獸～

第二間日嚐，依然都係日式小店，定食內容豐富。慢煮黑毛豬配肉桂蘋果蓉，黑毛豬帶點脂肪油香，配上肉桂蘋果蓉真係好夾！依家天時熱辣辣，食返碗凍蕎麥麵涼吓都好。佢哋嘅柚子紫薯青蘋果沙律好有驚喜，重紫薯味之餘仲有蘋果嘅清香，正呀！

銘興山西刀削麵應該係最跳脫嘅一間，出名刀削麵，今次叫咗從未試過嘅冷刀削麵，口感真係煙韌啲@@加上擔擔醬同沙律醬，連埋香辣過癮嘅口水雞，鍾意食辣嘅朋友仔唔好錯過^^

最後當然要由甜品作結，嚟到想甜嚐甜～必點開心果心太軟配乳酪雪糕，開心果味道堅濃郁～記得要連埋雪糕筒同乳酪雪糕一齊食，中和咗開心果嘅甜膩，唔食會後悔系列！！另外仲推咗芫荽限定甜品@@芫荽奶凍入口真係充滿芫荽味，口感新鮮又奇特，創新地將芫荽同奶凍結合埋一齊，芫荽控衝呀！

小島料理
地址：大角咀櫸樹街58號地鋪
慢煮肉眼丼大盛 $118

日嚐
地址：大角咀大全街13號大同新邨地下A號鋪
慢煮黑毛豬配肉桂蘋果蓉 $78

銘興山西刀削麵
地址：大角咀埃華街89-105號大同新邨L座大衛樓地下4B號鋪
口水雞刀削麵 $56 （轉冷刀削麵+$10）

想甜嚐甜
地址：大角咀嘉善街18號利奧坊二期地下G703號鋪
開心果心太軟配乳酪雪糕 $64
芫荽奶凍配乳酪蛋糕 $60