【大埔家姐帶路之大埔名物尖叫系列】今集繼續對唔住大家睇片時煩請降低音量｜繼續創造慘痛回憶｜大埔名物14粒｜藥房名貓叮叮噹噹｜極度崩潰雀屎路｜「椰青」咁大個布甸包｜大埔人真係好好｜大埔一日遊齊來找共鳴

繼上集長洲家姐之後，今集邀請到大埔家姐帶我遊足全日大埔～對於大埔嘅回憶仲停留係上年夏天，慘痛嘅玩水繩索尖叫經歷，一心諗住今集嚟大埔開開心心，點知都係忍唔住突發尖叫，對唔住大家，觀看影片時煩請降低音量，多謝合作。

未去玩，先去醫肚，大埔出名多嘢食，大埔家姐唔係帶我去熟口熟面嘅大埔墟熟食中心，而係去三不館車仔麵，呢間鋪頭好巴閉，如果晏少少到，免不了要排隊，大埔家姐話有時叫foodpanda要等超過一個鐘添呀！入到鋪頭，先唔講佢啲嘢食，單係姐姐嘅服務態度都俾足滿分！嘢食方面，記得要試佢哋嘅辣汁，香辣惹味，終於明白點解咁受歡迎。食嘅時候一定要落菜脯，甜甜辣辣，好食到自己買咗一樽返去做手信^^

第二間TakEateasy X FirsTeǎ，相信大家係IG都見過唔少佢哋嘅比利時玉桂蘋果餡格仔餅，Igable之餘，又係大埔人鍾意嘅嘢食！不過我自己對於蘋果餡格仔餅冇太大興趣，反而另一間麵包店仲吸引我@@
就係煒成麵飽，之前佢哋嘅焦糖布蕾法包曾經停售，依家終於有返，去到大埔一定要買返個食，勁好彩撞正出爐時間，輕輕鬆鬆就買到～見到實物估唔到佢成個「椰青」咁款！仲要$20咋，經濟實惠又美味，入面嘅蛋漿呈半融化狀態，家姐都忍唔住買多個返屋企食呀xd

最後一間，家姐推薦榕基滷水，轉咗新鋪，位置坐得更舒服～鵝肉鵝腸同滷豆腐必食，啲鵝肉又真係幾嫩，鵝腸又真係爽脆喎！可以試埋佢哋嘅辣汁，香而不辣，果然冇介紹錯。

唔知大家平時去大埔會食啲咩呢？
今次食嘅都係大埔人平時食嘅嘢為主，雖然唔係最出名嗰幾間，但呢幾間絕對唔差！同家姐行咗成日，先知原來大埔真係好大，你哋又行勻晒成個大埔未？

今集依然係資訊性滿滿＋大埔人共鳴系列。好似大埔名貓、雀屎路同14粒等等，一講完大家都明㗎啦～片入面大埔家姐講嘅3樣大埔名物，你哋又認唔認同呢？唔准諗即刻答：講底3樣大埔名物！

*特別鳴謝大埔家姐

三不館車仔麵
地址：大埔廣福道88號地下
兩餸一麵 $34 （秘制香醬鳳爪、滷水鮮豬大腸）
三餸一麵 $42 （醬燒豬頸肉、清甜蘿蔔、蠔油冬菇）
茶記奶茶 $22
金牌口水雞 $32

TakEateasy X FirsTeǎ
地址：大埔寶湖道3號寶湖商場2樓227F號鋪
比利時玉桂蘋果餡格仔餅 $29
百香火龍龍井茶 $29
黑糖珍珠奶茶 $32

煒成麵包食品店
地址：大埔同秀坊11號地鋪
西米布甸 $11
焦糖布蕾法包 $20

榕基滷水專門店 1992
地址：大埔廣福道97-99號地鋪
招牌滷水獅頭鵝（例） $80
爽脆滷鵝腸（一兩） $19
滷豆腐 $12

撰文、主持：Yvonne Lam
攝影、剪接：Doris Wong
美術：Anita Lam

更多文章