【18區搵食-牛頭角都有精緻日餐＋$138一件蛋糕？】長期俾小巴遮住嘅川菜店｜酸辣粉煙韌Q彈｜男人最愛金飯館炒飯｜分量大鑊氣重｜工廈內隱藏嘅精緻日餐｜牛頭角都有一汁三菜｜入口即融豚角煮

【18區搵食-牛頭角都有精緻日餐＋$138一件蛋糕？】長期俾小巴遮住嘅川菜店｜酸辣粉煙韌Q彈｜男人最愛金飯館炒飯｜分量大鑊氣重｜工廈內隱藏嘅精緻日餐｜牛頭角都有一汁三菜｜入口即融豚角煮｜$138一件蛋糕？｜食得落肚嘅藝術品

講到觀塘大家都熟晒路，牛頭角又熟唔熟呢？今集就帶大家嚟到觀塘過少少嘅牛頭角一齊搵食～

第一間又一川，之前夜晚嚟過幫襯，食飯時間唔單止爆場，門口仲有條小人龍，人氣極旺。呢度主打川菜同水煮系列，人人食過都大讚，今次lunch time過嚟叫咗碗四川酸辣粉，單係配料都多過平時，例如有：脆豆、酸菜、肉醬、酸豆角、葱同芫荽，自選配料，推薦萵筍同豬腸，仲有酸辣土豆絲都好多客人鍾意，味道酸酸辣辣，愈食愈上癮！

第二間金飯館，可謂男士福音，因為呢度嘅炒飯碟碟重量級，夠鑊氣之餘主菜仲好吸引。好似有：招牌蝦頭油炒飯、秘制沙嗲牛肉雙燶邊蘭王蛋飯等等，聽到都流晒口水！今次叫嘅脆皮牛腩飯夠特別，外皮真係脆卜卜，包住肥瘦適中嘅牛腩，再點埋沙嗲汁一齊食，正呀！

第三間薑媽，估唔到係牛頭角工廈都搵到精緻嘅日本套餐，主打一汁三菜定食，推薦豚角煮！雖然有啲肥膏喺到，但入口即融嘅口感令人無法抗拒，仲煮得好入味添。定食自選一款配菜，揀咗和風蟹棒沙律夠晒健康。依家推廣期間仲可以免費升級任何飲品，玄米茶拿鐵清清哋唔會好甜，見到好多客人都叫mocha，賣相望落都唔錯㗎～

最後一間脈搏•弄館，一開頭俾佢嘅「世外孤峰」吸引，IG見到啲相真係好靚！雖然要$138一件，但當你見到佢個造型成個藝術品咁，呢個價錢，又好似俾得落手喎。當日蛋糕係鐵觀音檸檬味，入面嘅慕絲香滑，伴隨住啖啖茶香，檸檬降低咗蛋糕嘅整體甜度，再配一壺熱茶簡直perfect！

又一川
地址：觀塘宜安街25號地下
四川酸辣粉 $53
酸辣土豆絲 $52

金飯館
地址：牛頭角牛頭角道323號地下J號鋪
脆皮牛腩飯（秘製沙嗲汁） $78

薑媽
地址：牛頭角大業街29號海洋工業中心1樓A室
一汁三菜定食豚角煮 $112

脈搏•弄館
地址：牛頭角偉業街93號地鋪
世外孤峰 $138（鐵觀音檸檬）
碳焙桂花烏龍 $48

主持、撰文：Yvonne Lam
攝影、剪接：Doris Wong
美術：Anita Lam

更多文章