【18區搵食-全港最後一間「扒王之王」＋豬柳蛋雞蛋仔？】最愛豬柳強｜豬柳蛋雞蛋仔愈食愈上癮｜同場加映手撕雞雞蛋仔｜冬菇雞軟骨餃好味｜港式鐵板餐｜全港最後一間扒王之王｜埋單唔使$100嘆鐵板牛柳

【18區搵食-全港最後一間「扒王之王」＋豬柳蛋雞蛋仔？】最愛豬柳強｜豬柳蛋雞蛋仔愈食愈上癮｜同場加映手撕雞雞蛋仔｜冬菇雞軟骨餃好味｜港式鐵板餐｜全港最後一間扒王之王｜埋單唔使$100嘆鐵板牛柳｜係咪傳說中咁伏？｜焦糖布甸椰皇子｜椰皇水果凍有驚喜！

仲記得上次嚟石門落住大雨非常狼狽，今集再戰沙田嚟個大反轉，超級無敵大晴天，令我瞬間愛上沙田，住沙田嘅朋友仔好幸福呀！

第一間係乙明邨嘅潮食，呢度最出名就係豬柳蛋雞蛋仔！聞名不如見面，見住店員將豬柳同雞蛋放入雞蛋仔入面，食落第一啖覺得還好，但食食吓竟然食上癮咁，食唔停口。味道都幾融合，除咗豬柳鹹咗啲，冇咩大問題～同場加映估佢唔到：手撕雞雞蛋仔，呢個反而麻麻哋，手撕雞同雞蛋仔完全夾唔到一齊，味道分開晒，都係食返豬柳蛋啦各位～

第二間去到滋味食堂，大愛餃子嘅小編，一早聽聞呢間小店嘅餃子非常出色，有常見嘅餃子之餘，仲有啲特別餡料。好似冬菇雞軟骨餃、酸豆角鮮肉餃同埋西洋菜陳腎餃等等。冬菇雞軟骨餃，大讚！冬菇鮮甜，雞軟骨爽脆嘅口感，就咁蘸少少醋已經好出色，食得辣嘅朋友仔，建議加埋黃辣椒，味道仲正！酸豆角鮮肉餃都好食，同樣爽脆嘅酸豆角為餃子增添口感，餃控要嚟試呀！

跟住嚟到全港執剩最後一間嘅「扒王之王」，扒王之王可以話係元祖級港式鐵板扒餐嘅代表，曾經有好多分店。網上流傳佢哋嘅食物好伏又難食@@作為從來冇食過扒王之王嘅我，今日就以一個持平嘅食客觀點試試伏。叫咗扒王牛柳，賣相唔差，牛柳厚身，食落肉質都可以喎，唔會好老好嚡口或者咬唔開，都有牛味嘅。依家全日有8折優惠，埋單唔使$100，冇傳聞講到咁伏喎…

最後一間同樣係以甜品作結，甜入心係camman力推嘅甜品店，呢度嘅椰皇子有啲料！叫咗焦糖布甸椰皇子，焦糖布甸口感綿密，帶有椰香，最底係椰皇水果凍，入口清香，椰子味濃厚，夏天食一流呀！

潮食 (乙明邨街市)
地址：沙田乙明邨街9號地下乙明邨街市2-3號鋪
豬柳蛋雞蛋仔 $31
手撕雞雞蛋仔 $30

滋味食堂
地址：沙田崗背街9-11號全輝中心B座地下21號鋪

套餐B：10隻餃子(水煮)+時令油菜+涼拌小食1款 $53 (餃子雙併+$2)
冬菇雞軟骨餃，酸豆角鮮肉餃（夏季限定）
泡椒鳳爪

扒王之王

地址：沙田瀝源街7號沙田娛樂城地下C1鋪
扒王牛柳 $97 （全日8折）
原價 $108

甜入心
地址：沙田橫壆街1-15號好運中心地下L8F號鋪
焦糖布甸椰皇子 $47

主持、撰文：Yvonne Lam
攝影、剪接：Doris Wong
美術：Anita Lam

更多文章